【日本橫濱新酒店】1936 年歷史建築變身精品酒店！The Maritime Hotel Yokohama Bay 2027 年 1 月開業，全館僅 50 間房、步行 2 分鐘到馬車道站
日本橫濱有新酒店登場！由建於 1936 年、擁有近 90 年歷史嘅「橫濱郵船大樓」改建而成嘅全新精品酒店 The Maritime Hotel Yokohama Bay（ザ マリタイムホテル 横浜ベイ），將於 2027 年 1 月 30 日正式開業，並已於 2026 年 10 月 26 日開始接受預訂。酒店保留昔日歷史建築特色，全館只有 50 間客房，分別以世界各地港口城市作為設計主題。酒店位置亦相當方便，距離港未來線「馬車道站」步行只需約 2 分鐘，前往橫濱市內各大景點都方便。房價每間每晚由 44,000 日圓起。
▼ Runhotel 幫你搜尋最平預訂網站 ▼
1936 年歷史建築活化！保留橫濱昔日港口風情
▼The Maritime Hotel Yokohama Bay 由日本酒店及餐飲集團 Plan・Do・See 打造，前身係 1936 年落成嘅「橫濱郵船大樓」，曾經係日本郵船橫濱分店所在地，亦被視為橫濱最後一座古典主義建築。
▼今次酒店改建特別保留歷史建築原有特色，並融入橫濱作為國際貿易港口嘅文化背景。酒店大堂以「郵輪內劇場入口」作為設計概念，館內亦擺放船舶模型及充滿航海氣息嘅裝飾，令住客彷彿走入昔日橫濱港嘅黃金年代。
全館只有 50 間客房！以世界港口城市為設計主題
酒店只有 50 間客房，走私密精品酒店路線。客房設計靈感來自昔日與橫濱港有貿易往來嘅世界各地港口城市，包括孟加拉、亞歷山大、波士頓及廣東等，每間房都融入不同地方嘅文化及設計元素。
其中 The Heritage Room「孟加拉」面積約 48 至 54 平方米；The Maritime Suite「亞歷山大」面積約 75 至 80 平方米，空間相當寬敞。另外仲有面積約 45 平方米嘅 The Gallery Room「廣東」及 The Maritime Room「波士頓」。
▼ The Heritage Room「孟加拉」客房，面積約 48 至 54 平方米。
▼The Maritime Suite「亞歷山大」套房，面積約 75 至 80 平方米。
▼The Gallery Room「廣東」客房，面積約 45 平方米。
▼The Maritime Room「波士頓」客房，面積約 45 平方米。
客房設備同樣講究，包括日本有田燒陶瓷桌面、採用世界各地布料製作嘅訂製座椅，以及 Simmons 床褥。浴室提供英國品牌 Molton Brown 沐浴用品，房內亦設有 Tivoli Audio 藍牙音響。酒店仲會喺每日傍晚 5 時至晚上 8 時提供夜床服務，提升入住體驗。
日本酒店首度引入 Nike Strength！24 小時健身室免費借運動裝備
除咗客房設計，酒店另一大賣點就係健身設施。The Maritime Hotel Yokohama Bay 將成為日本首間引入 Nike Strength 訓練設備嘅酒店，健身室 24 小時開放，方便住客隨時做運動。
特別嘅係，酒店健身室刻意唔設跑步機，而係鼓勵住客走出酒店，沿住橫濱街道及海濱跑步。酒店會提供附近跑步路線資訊，仲有免費運動服及運動鞋借用服務，唔使自己帶齊裝備都可以做運動，一邊跑步一邊欣賞橫濱港景色。
設意式及西班牙餐廳！歷史建築內歎早餐、下午茶
酒店設有全日餐廳 Restaurant Deck，提供早餐自助餐、午市套餐及晚餐，主打意大利及西班牙料理。餐廳設有開放式廚房及戶外露台座位，住客可以喺充滿歷史氣息嘅建築內享受美食。
餐廳亦會供應由甜品師特別製作嘅精緻甜品，適合想安排悠閒下午茶嘅旅客。
另外，酒店亦設有住客專用 Lounge，保留昔日建築嘅高樓底及原有天花設計，配搭典雅傢俬，營造出懷舊而高級嘅氛圍。Lounge 會按不同時段提供飲品、酒精飲品、小食及甜品，俾住客可以喺酒店內慢慢歎。
提供房內 Spa、客房送餐服務及單車租借
The Maritime Hotel Yokohama Bay 仲提供房內 Spa 療程及客房送餐服務，住客唔使離開房間都可以享受放鬆體驗。如果想探索橫濱海濱一帶，酒店亦設有住客專用單車租借服務，方便旅客踩單車遊覽附近景點，感受橫濱港口城市嘅悠閒氣氛。
The Maritime Hotel Yokohama Bay（ザ マリタイムホテル 横浜ベイ）
地址：日本神奈川縣橫濱市中區海岸通 3-9-1
交通：港未來線「馬車道站」步行約 2 分鐘
酒店地圖：Google Maps 查看酒店位置
▼ Runhotel 幫你搜尋最平預訂網站 ▼
其它日本新酒店
- 【別府新酒店】ROCK and STEAM by SEKIYA RESORT｜2026 年 12 月別府鐵輪全新開業 岩石溫泉浴槽配私人茶室桑拿
- 東京日本橋新酒店 AIMA Nihonbashi ，2026年10月新開幕 ，江戶古道日本橋的全新公寓式酒店
- 星野界藏王 KAI Zao｜今年首度進駐山形縣 全日本罕見14 角形高塔溫泉旅館
- 北海道札幌凱悅尚萃酒店開幕｜最平$1,152 一晚 大通公園旁200米 望紅磚廳舍全景
