【皇家加勒比郵輪體驗餐飲篇】食均 8 間餐廳及酒吧,免費自助餐有一日會加特殊菜式,主餐廳晚餐每日轉新款!
遊輪餐飲真係難食過飛機餐?早前小編就去體驗了皇家加勒比郵輪海洋光譜號的 4 日 3 夜公海遊,期間分別試了 4 間免費餐廳及房內早餐,包括帆船自助餐廳、主餐廳、索倫托餐廳、海上多功能運動熱狗屋,以及 4 間收費餐廳及酒吧,包括奧利弗義大利餐廳、大董意境坊、泉.日式餐廳,全部質素都唔差,而且份量十足,即使是免費餐廳都絕對比飛機餐好食幾倍!
其中免費的帆船自助餐廳雖然冇海鮮食,不過就有唔少燒烤美食提供,而且中西式食品都有,如燒牛扒、即切牛肉、口水雞、西班牙海鮮飯等等,環境亦比較開揚,可以被兩邊海景包圍,而且整個旅程中會有一日提供特殊菜式,小編第三日就見到有新加設朱古力噴泉,有讀者報料指見過有龍蝦提供添㗎!另一個免費的主餐廳提供菜式更為精緻,每枱仲會有專屬服務員款待,都幾有食緊 Fine Dining 感覺,而小編體驗當晚叫過的炙烤龍蝦尾都好正,真係有手掌咁大,而且口感彈牙。最正係餐廳會每晚亦都轉新的晚餐餐牌,即使日日去食都唔會悶!想知每間餐廳詳細有咩好食就睇下文啦~
今次小編亦有預訂埋「美味暢享套餐」,每人每晚 US$26.72 起,可於美式牛排館、奧利弗義大利餐廳、川谷薈、海涵火鍋、泉.日式餐廳(限 US$35 餐飲消費額,不含服務費)享用每日午餐及晚餐,但每餐僅限選一間餐廳,而且必須全程購買。同時,亦都預訂咗大董意境坊的九道菜套餐,每位 US$75。所有餐飲套餐 5 歲以下小童免費,而 6 – 12 歲兒童於特色餐廳用餐只需 US$10,於啟航之前預訂的話,兒童價格會在登船後再進行調整,最後 Check 返單就會見到平咗㗎啦!(查看所有餐飲套餐優惠按此)另外提提大家,船上免費餐廳都不需預約,可以隨時入座進餐,但其他收費特色餐廳都需要預約時間,上船後記得先用遊輪 App 預約定座位,根據小編今次的經驗,整個航程的大部份餐廳座位於第一日就會預約滿座。
▼ 海洋光譜號公海遊預訂網址 ▼
http://www.royalcaribbean.com.hk/
想知最新皇家加勒比郵輪優惠,可以參考:https://www.runhotel.hk/royalcaribbean-promo
▼帆船自助餐廳只有提供早餐及午餐,分別於 7:00am – 11:00am 及 11:30am – 3:00pm 供廳,而最後一日的早餐時間則由 6:00am – 9:00am 供應,所以唔使擔心咁早落船會冇早餐食。
▼門口側邊就有洗手位,所有食客入餐廳之前要先洗手,入到餐廳之後,大家想食咩就話俾職員知,等職員幫你夾,以保證衛生。
▼餐廳位於 14 樓,兩邊都係落地大玻璃,可以被海景包圍住慢慢食~
▼自助早餐有薯餅、煙肉、腸仔、鬆餅、丹麥酥、冬甩、乳酪、即叫即整奄列等等,而中式的粥、炒麵、炒粉麵飯以及即煮麵檔
▼而自助午餐就有燒牛扒、薯角、沙律、西班牙海鮮飯等等,而中式的就有口水雞、炒牛肉、春卷、炒粉麵飯及各種蒸包等,同樣都有即煮麵檔。
▼仲有水果同甜品
▼飲品吧有提供咖啡、茶、果汁等飲品
▼每次航程都會有一日的自助午餐提供特別菜式,而今次小編於第三日就見到有朱古力噴泉,聽其他去過的讀者講仲有見過提供龍蝦㗎!
▼坐窗邊位望住海景食最正!
▼主餐廳有分開上下兩層,於早午晚三餐時段都有開放,客人可以按房卡上「Dining」一項寫著的樓層,到相應的甲板用餐。
▼主餐廳每晚餐牌都唔一樣,晚晚去食都會有新鮮感!而小編體驗當晚就有以下的菜式可以揀,中西式都有齊,而且全部都可以任點任食。
▼每枱會先上一份餐包,另外小編試了 3 款前菜,分別是意式蔬菜湯、維達麗雅洋蔥餡餅、鴨肉海鮮醬沙拉
▼主菜就有炙烤龍蝦尾及烤牛里脊肉,其中龍蝦真係超大隻啖啖肉!
▼而甜品就點了焦糖布丁及熔岩巧克力蛋糕,焦糖布丁有手掌咁大份!
▼中午到傍晚時間,玩完水又或者做完運動想食小食,就可以去海上多功能運動熱狗屋
▼側邊仲有溫水、冰水同青檸水提供
▼又或者可以另外加購飲品
▼熱狗的麵包、腸同配料都可以自由搭配
▼半夜肚餓要食宵夜就可以去索倫托餐廳,其開放時間到凌晨 2 點。
▼店內有 4 款 Pizza 可選,全部都係薄批,其中有一款仲係素食添!
▼呢邊都有飲品吧提供咖啡、茶、果汁等
▼每房仲有包一次免費房內歐陸式早餐送餐服務,有各式果汁飲料、麵包、谷物、水果及乳酪可選,全部都係任點任食!
▼將成盤早餐拎出去露台,望住呢個海景食真係超爽!非常建議大家留一日叫房早餐!
▼房早餐提供的食物同自助餐、主餐廳提供的都一樣,只係選擇相對少一點。
收費餐廳
▼Jamie’s Italian 奧利弗義大利餐廳主打新鮮手工意粉
▼招牌之一的 Classic Meat Plank,超適合送酒食
▼前菜 Baked Mushrooms 及 Crispy Squid
▼意粉方面就試了 3 款,分別是 Prawn Linguine、Truffle Tagliatelle 及 Seafood Linguine,以及一款配菜 Crispy Polenta Ships
▼意粉口感煙韌真好食!
▼甜品就叫了 Classic Tiramisu、Ice cream 及 Sorbet,其 Tiramisu 特別在於加入了少許橙皮,食落帶股橙香味,而且蛋糕比例較多,食起黎冇咁易腻。
▼大董 Wonderland by Dadong 是北京烤鴨名店,提供 Fusion 中菜
▼餐廳內部設計都真係好似 Wonderland 咁好夢幻
▼呢到餐牌仲要用毛筆點墨水掃開先睇到,超得意!今次一共會體驗 9 道菜
▼首先係鮮花椒熗象拔蚌,選用加拿大象拔蚌炮製而成,食落帶麻香味好開胃
▼煙熏老干媽三文魚牛油果卷,有濃郁的木香味
▼芥子醬冰菜沙律,口感好爽脆
▼跟住係得獎名菜黑松露墨魚汁文思豆腐,白色一絲絲的都係豆腐黎架!
▼鵝肝汁小牛肉,肉質超軟嫩
▼藏紅花汁龍蝦飯
▼招牌片皮鴨有多達 8 款配料提供
▼鴨肉都唔少架!
▼松露肉醬麵
▼最後甜品陳皮雪糕,記得要撈埋側邊陳皮一齊食啊!
▼泉.日本餐廳 Izumi Japanese Cruisine
▼可以坐師傅面前睇住即切魚生、即整壽司
▼套餐收費 US$34.99,每位可以點 1 個小份、2 個大份及 1 個甜品,不過大份的份量都真係幾多,建議大家可以先叫一份,唔夠食先再叫多個。
▼小編小份點了蝦仁蔬菜天婦羅、海帶裙帶菜沙拉(中華沙律)及日式豬肉鍋貼,其中鍋貼煎得好香,咬落夠晒脆。
▼豚骨拉麵湯頭濃郁
▼IZUMI 太卷壽司份量超多,唔止卷內有天婦羅,卷外亦都有炸過,香脆之餘帶點辣味,超好食!
▼主廚推薦壽司,每件壽司都已經加入少量 wasabi,真係好正宗做法。
▼香煎半熟金槍魚壽司卷都好值得一試!吞拿魚配上牛油果入口即化,咬到中心位又有香脆的蝦天婦羅,而蒜味柚子醬又帶出一點清爽感,好好食。
▼脆芝麻球,中間有黑芝麻蓉,食落幾似煎堆仔。
▼各式燸米團雪糕,包括有朱古力、芒果及抹茶 3 款口味
▼綠茶雪糕超重奶味,比較甜一點。
▼海洋光譜號其中一個賣點就是機械人酒吧 Bionic Bar
▼客人拍房卡後,可以按喜好自選飲料、酒及調製方式,然後由機械臂幫你調酒!非酒精飲品 US$4 起,而酒精飲品 US$6 起。
▼拍卡就可以拎到專屬特調飲品啦!
▼ 海洋光譜號公海遊預訂網址 ▼
http://www.royalcaribbean.com.hk/
皇家加勒比郵輪上玩樂體驗,可以參考上一篇:https://www.runhotel.hk/royalcaribbean-facilities
【皇家加勒比郵輪體驗玩樂篇】超過 10 個船上必玩設施、必睇表演一文看!仲有兒童託管所同青少年中心!
想知最新皇家加勒比郵輪優惠,可以參考:https://www.runhotel.hk/royalcaribbean-promo