【BEB5門司港】 星野福岡新酒店 2026 年 7 月登場！擁 24 小時 TAMARIBA 頂層公共空間，每晚房價人均 6,600円起
講到日本酒店品牌，星野リゾート 一向都係質感保證。2026 年夏天，品牌終於首次進駐福岡縣，選址充滿懷舊風情嘅門司港，開設全新海景酒店 —— BEB5 門司港 by 星野リゾート，將於 2026 年 7 月 24 日正式開業！主打「トキメキ海峡ステイ」，全酒店 119 間客房全部面向關門海峽，加上 24 小時開放、可自攜美食嘅頂層公共空間，打造一種「居酒屋以上、旅未滿」嘅全新自由住宿體驗。如果你計劃 2026 年夏天去福岡，呢間一定要 Bookmark！
▼預訂網址▼
https://hoshinoresorts.com/zh_tw/hotels/beb5mojiko/
全酒店 119 間客房全海峽 View：日落＋船景
BEB5 門司港最大賣點，就係——全 119 間客房全為海景房。每間房都面向關門海峽，由早到晚景色不停變化：白天可以望住船隻往來，黃昏時分睇住海面染成金橙色，入夜後再欣賞關門橋燈光亮起，畫面感十足。房型方面：「海峡ツイン」最多可住 3 人、「ヤグラルーム」最多可住 4 人、「ヤグラルーム」設計似秘密基地，上下分層結構，適合一班朋友或家庭入住。所有客房窗邊都設有大型日式「くつろぎ寝台」Day Bed，可以攤喺窗邊，一邊飲嘢一邊睇海，慢慢 hea 足一個下午，感受 BEB 品牌嘅生活態度。
24 小時開放TAMARIBA 自攜美食＋看海
位於酒店最頂層嘅公共空間「TAMARIBA」係整間酒店另一亮點。此空間 24 小時開放，而且鼓勵客人自攜飲食，客人可以自行去門司港買地道海鮮、小食或者酒水，帶返酒店，同朋友圍坐吹水，氣氛比居酒屋更自在，但又比一般旅行住宿更有儀式感。日頭可以望住關門海峽熱鬧景象，夜晚就睇住關門橋燈光同海面倒影，無論傾偈、玩 Board Game 定純粹放空，都好適合。品牌口號「居酒屋以上 旅未満」，強調旅行可以輕鬆、隨性一點。
人均6,600円起！星野品牌中超高CP值之選
BEB5 門司港房價由每位6,600円起（2人1室計算，含稅，不含餐），以星野品牌嚟講算係非常親民價位。加上全房海景＋地段優勢＋24小時公共空間，性價比好高。酒店於 2026 年 7 月 24 日正式開幕﹐地點都相當方便，JR鹿兒島本線「門司港站」步行約 4 分鐘即可到達。如果打算暑假去福岡，想住得有特色又唔太貴，呢間會係好好嘅選擇。
門司港レトロ＋關門海峽絕景 福岡少有懷舊海港氛圍
BEB5 門司港坐落於人氣景點「門司港レトロ」區域，呢度以大正浪漫風格聞名，歷史建築林立，夜晚仲會亮燈，氣氛特別迷人。最具代表性嘅包括日本重要文化財 —— 門司港駅，仲有充滿歐洲風情嘅旧大阪商船、旧門司三井倶楽部同旧門司税関，而門司港最震撼嘅，當然係關門海峽景色。全長1,068米、連接本州與九州嘅関門橋，無論日落定夜景都超靚，仲可以行「關門隧道人道」徒步由九州去到本州添！
BEB5門司港 by 星野リゾート
酒店資訊 開業日期：2026 年 7 月 24 日
房價：每位 6,600 円起（2人1室，含稅，不含餐）
交通：JR鹿兒島本線「門司港站」步行約4分鐘
▼預訂網址▼
https://hoshinoresorts.com/zh_tw/hotels/beb5mojiko/
(adsbygoogle = window.adsbygoogle || []).push({});