【荃灣西新酒吧 Bar 41】 10 月 1 日開幕！41 樓 270 度全景睇日落，下午茶每位 HK$244、歡樂時光買一送一
荃灣西又有新地方歎下午茶同飲酒喇！位於荃灣西如心酒店 41 樓嘅 Bar 41 將於 2026 年 10 月 1 日正式開幕，酒吧早前斥資逾 HK$1,100 萬翻新，以現代 Art Deco 設計打造全新高空酒吧及酒廊。場內設有 80 個座位，透過落地玻璃幕牆坐擁 270 度全景，望住荃灣市景、藍巴勒海峽至香港島天際線，日間可以歎下午茶，黃昏就啱晒睇日落，夜晚再飲返杯雞尾酒。Bar 41 開幕期間仲準備咗一系列優惠，包括下午茶第二位半價、歡樂時光精選飲品買一送一，以及歡樂時光套餐 8 折，想試新場嘅朋友可以留意喇！
41樓高空全景酒吧，坐擁270度荃灣景色
Bar 41 位於荃灣西如心酒店 41 樓，酒店所在建築物為新界最高建築，亦是全港第六高摩天大樓。酒吧佔地約 344 平方米，共設 80 個座位，座位分布於舒適角落及較熱鬧嘅社交空間，無論係兩個人約會、朋友聚會，或者想搵個地方靜靜地欣賞景色都適合。
酒吧由國際設計公司 Aedas 操刀，以現代裝飾藝術風格 Art Deco 為設計靈感，加入流線造型、幾何元素、木材、祖母綠色調及黃銅細節，整體感覺時尚得嚟又唔會太浮誇。
場內最搶眼嘅位置就係主吧台，全高酒藏陳列以雕塑般嘅姿態成為空間焦點，配合落地玻璃幕牆，可以一邊睇住調酒師準備飲品，一邊欣賞窗外景色。室內亦以條紋玻璃、透明光球營造柔和燈光，配搭綠色皮革座椅、米色卡座及天然石灰華桌面，營造出舒適又有格調嘅高空雅聚空間。
牆身仲展出本地藝術家 梁將（Joshua Leaung）嘅油畫作品，作品捕捉荃灣西夜色嘅變化，令 Bar 41 除咗係飲酒食嘢嘅地方，亦多咗一份本地藝術同社區氣息。
日間下午茶，黃昏歡樂時光，夜晚飲雞尾酒
Bar 41 每日由中午 12 點營業至晚上 11 點，提供全日單點餐牌，餐飲選擇由午餐、下午茶、酒吧小食，以至晚間雞尾酒及葡萄酒都有。日頭想搵個景靚嘅地方食飯，或者收工後想飲杯嘢放鬆，都可以按自己時間安排。
午間有全日單點餐牌及午餐選擇；下午 3 點至 5 點半供應下午茶，適合一邊欣賞高空景色，一邊慢慢食鹹甜點。下午 5 點半至 8 點就係歡樂時光，精選紅白酒及啤酒有買一送一，另有精選小食拼盤及啤酒套餐 8 折優惠。
晚間就可以點選 Whisky Sour、Old Fashioned、Mojito 及 Margarita 等經典雞尾酒，亦有一系列葡萄酒及烈酒供選擇。食物方面，酒吧小食包括香烤肉類、精選海鮮或火腿芝士小食拼盤、和牛鴨肝漢堡、墨西哥辣肉醬芝士餡餅及香脆炸雞翼，幾款都幾適合配酒分享。
Bar 41 X 民豐「綿糯時光」下午茶
為慶祝新酒吧開幕，Bar 41 特別聯乘荃灣老字號 民豐粉麵行，推出限定「綿糯時光 — Bar 41 X 民豐下午茶」。呢次下午茶將本地懷舊味道加入酒店下午茶之中，鹹點包括九制陳皮黑毛豬叉燒酥、香煎蟹肉餅配他他醬，以及香煎鴨肝配港式西多士。
甜點就由 Nina Patisserie 負責，包括迷你芒果拿破崙、迷你士多啤梨忌廉海綿蛋糕及迷你伯爵茶紅桑子蛋糕，最後仲有民豐經典花生及黑芝麻糯米糍，並配咖啡或茗茶。下午茶每日 3:00pm 至 5:30pm 供應，每位 HK$244，兩位起，所有價格另收加一服務費。開幕優惠期間，即 2026 年 10 月 1 日至 31 日，下午茶第二位賓客可享半價，兩位同行就更加抵食。
Bar 41 於 2026 年 10 月開幕期間推出以下優惠：
- 下午茶第二位賓客享半價
- 歡樂時光精選紅白酒及啤酒買一送一（每日 5:30pm – 8:00pm）
- 歡樂時光精選小食拼盤及啤酒套餐 8 折
- 如心賞會員可隨時享用全日單點餐牌最高 85 折優惠
優惠有效期及餐牌安排或會因應酒店安排而更改，出發前建議先向酒店查詢及預訂座位。
Bar 41 餐廳資料
地址：荃灣楊屋道 8 號荃灣西如心酒店 41 樓
營業時間：每日 12:00pm – 11:00pm
下午茶：每日 3:00pm – 5:30pm
歡樂時光：每日 5:30pm – 8:00pm
電話：+852 2280 2796
Instagram：@ninahoteltsuenwanwest
官方網站：https://www.ninahotelgroup.com/zh-hk/nina-hotel-tsuen-wan-west/dining/bar-41/
以上餐飲價格須另收加一服務費；優惠及營業安排或會更改，預訂時請以酒店官方公布為準。
