【台北新酒店 2026】萬豪艾美進駐板橋！高空酒吧＋無敵景觀＋藝術設計，台北板橋馥華艾美酒店 6 月開幕
想搵一間又有設計感、又有打卡位、仲可以望住城市夜景歎住酒嘅台北酒店？今個夏天台北又有新選擇！隸屬萬豪國際集團旗下高端品牌嘅「台北板橋馥華艾美酒店」即將開幕，選址板橋核心地段，未開幕已經話題十足。由建築到室內設計，再到餐飲同藝術策展，每一個細節都好認真，絕對係今年最值得期待嘅新酒店之一，副線仲有另一間設計系新酒店PORTRAIT鉑萃酒店預計秋季登場，一次過幫你鎖定台北兩大新住宿熱點！
▼萬豪官網預訂網址▼
https://www.marriott.com/zh-hk/hotels/tpemb-le-meridien-taipei-banqiao/overview/
板橋新地標誕生 31 層建築＋國際級設計團隊加持
艾美酒店今次直接落戶板橋中山路核心，樓高 31 層，由紐約著名建築事務所 HANDEL Architects 操刀，以「Connect」為設計核心，將國際都市風格同在地城市脈動融合。外觀線條俐落又有辨識度，開幕後幾乎可以預見會成為新北新地標。整棟酒店最 signature 嘅設計，一定係位於 18 樓嘅「光盒子」。透過光影變化營造流動感，日頭同夜晚會呈現完全唔同嘅視覺效果，酒店唔只係住宿空間，更似一件會呼吸嘅城市藝術品。
室內設計由 BLINK Design Group 操刀，並由設計師 Clint H. Nagata 主理，將板橋街區歷史元素同法式優雅美學融合。拱門、廊柱同細節位都充滿節奏感，行入去唔單止係住酒店，更似置身一個有故事嘅藝術空間。館內集合 14 位本地及國際藝術家作品，由入口雕塑到大堂裝置藝術都精心策劃，令住客由 check-in 開始已經進入沉浸式藝術體驗。
高空酒吧＋高空泳池 坐擁山景＋台北 101
餐飲方面同樣有驚喜，全日餐廳「花漾」以亞熱帶花園為靈感，走優雅法式氛圍；中餐廳「茉莉苑」主打茶文化，帶出東方款待精神；而大堂酒廊「北緯二十五 LATITUDE 25」就延續艾美品牌「緯度」概念。最吸引一定係 18 樓嘅高空酒吧「LUMI BAR」，夜晚可以一邊望住城市夜景，一邊歎 cocktail。設施方面亦唔馬虎，18 樓設有泳池、24 小時健身室同桑拿，全部都係高空配置。客房則位於 19 至 31 樓，多數房型都可以望到山景，部分更可以遠眺台北 101，真正做到「住喺城市上空」。
同場加映：台北車站隱奢新酒店 露台房型超罕有
如果你鍾意設計感再重啲，可以留意同樣即將開幕嘅 PORTRAIT 鉑萃酒店。主打台北市中心少見嘅「獨立露台房型」，仲集合多位設計師跨界合作，以「城市中的綠色珠寶盒」為靈感。酒店更將附近公園重新打造，將綠意延伸入住宿空間，將都市同自然融合，走一種低調但精緻嘅隱奢路線！
台北板橋馥華艾美酒店
地址：新北市板橋區中山路一段220號
▼萬豪官網預訂網址▼
https://www.marriott.com/zh-hk/hotels/tpemb-le-meridien-taipei-banqiao/overview/
(adsbygoogle = window.adsbygoogle || []).push({});