【台北東區新酒店】全台首間身心靈療癒旅宿！嵨開安旅 HOTEL UKETAMO每晚房價 HK$1,638 起，住客可免費參加瑜伽冥想！
如果你覺得而家去旅行，已經唔再只係「影相打卡、瞓一晚就走」，而係想真正放慢腳步、好好休息一下身心，咁台北最新開幕、位於東區核心地段嘅 「嵨開安旅 HOTEL UKETAMO」，絕對值得放入清單。呢間由福泰飯店集團自創嘅全新品牌，被譽為全台首間主打「身心靈療癒」嘅城市旅宿，由捷運忠孝復興站行過去只需約 3 分鐘，但一踏入酒店，就好似由鬧市瞬間走入一座安靜嘅山。
「嵨開安旅」品牌靈感源自日本山形縣山伏修行文化，核心哲學來自「Uketamo（接納一切）」，意思係學習接納當下、回到內心安定。酒店整個動線設計就好似一段入山修行嘅過程——旅人穿過圓拱門走入館內，象徵由城市節奏慢慢過渡到內在世界。空間以低彩度、自然材質同大量留白為主，少咗酒店常見嘅繁複裝飾，多咗一份安靜同呼吸感。福泰飯店集團希望，嵨開安旅唔只係一間過夜嘅酒店，而係成為「城市中一座可以停留嘅山」，無論係短暫旅遊、商務出差，定係想畀自己一個 reset 時刻，都可以喺呢度重新找回平衡。
▼ Runhotel 幫你搜尋最平預訂網站 ▼
111 間客房 部分可遠眺台北 101
全館共有 111 間客房，每晚房價 HK$1,638 起。房型包括 10 坪「嵨岳豪華客房」、12 坪「嵨開公寓」同 17 坪「嵨開套房」，當中只有 5 間嵨開套房可以遠眺台北 101，相當搶手；另外約有 40 至 50 間客房設有浴缸，適合想浸個熱水慢慢放鬆嘅旅人。房內細節亦相當貼心，每間房都備有瑜伽墊、小型尼泊爾頌缽，並設有專屬影音系統，可以直接喺房內做瑜伽、呼吸練習，甚至體驗台灣較少見嘅克里亞瑜伽。針對都市人常見嘅睡眠問題，酒店亦準備咗蒸氣眼罩、晚安茶飲等放鬆備品，主打「深眠體驗」。洗沐用品選用台灣品牌茶籽堂，吹風機則按房型提供 Panasonic 或 Dyson，實用又有質感。
Plant Forward 餐飲概念
餐飲方面同樣呼應療癒主題。五樓餐廳 「Bliss & Bone」 以 Plant Forward 為飲食概念，早餐以植物性食材為主、蛋白質為輔，除咗有經典班尼迪克蛋、挪威三文魚，亦有以穀物、豆類、菇類同當季蔬菜組成嘅「佛碗」，清爽但夠飽足。現階段主要作為住客早餐空間，未來將轉型成全日餐廳。而一樓嘅 「MN | ZO Cafe & Pizza」，則主打自然發酵同地中海飲食精神，自家培養酸種麵團即叫即焗 Pizza，配合咖啡、康普茶等低負擔飲品，目標成為社區交流同旅人放鬆嘅聚腳點。
最大賣點：入住可體驗瑜伽、冥想、聲音療癒
酒店其中一個最大亮點，就係位於六樓嘅身心靈樓層。嵨開安旅與來自尼泊爾嘅國際療癒品牌 Avata Wellness 合作，設有瑜伽、冥想、聲音療癒同 SPA 療程，並引入台灣相對少見嘅克里亞瑜伽。課程唔追求高難度動作，而係強調「由內而外修復」，節奏溫和，適合初學者同長期壓力大嘅都市人。入住旅客可於住宿期間自由選擇早、午或晚間課程體驗，未來亦會對外開放，甚至提供企業團體放鬆方案。
另外，七樓嘅 「木守茶席」 為預約制茶席，每場最多 5 人，以台灣烏龍同鐵觀音為主，透過約 90 分鐘嘅品茶體驗，引導旅人回到專注當下嘅節奏，真正體會「慢」嘅價值。
▼ Runhotel 幫你搜尋最平預訂網站 ▼
