【芭堤雅 The Standard Pattaya Na Jomtien 新酒店】 2025 年 10 月開業，161 間客房、海景泳池、藝術裝置及首個海灘俱樂部！
芭堤雅又有新酒店喇！國際潮流酒店品牌 The Standard 終於來到芭堤雅，喺 Na Jomtien 海濱開設全新酒店「The Standard, Pattaya Na Jomtien」，2025 年 10 月已正式開幕。酒店延續品牌慵懶又帶前衛感嘅風格，結合悠閒海岸景致，距離曼谷只需約一小時車程，相信會成為東南亞新晉打卡度假地。酒店同時推出品牌首個海灘俱樂部 Esmé，以創意餐飲同時尚氛圍重新演繹海邊度假感覺。宜家已經可以 book 到了，每晚房價 HK$1,272（連服務費後 HK$1,504）起。
▼ Runhotel 幫你搜尋最平預訂網站 ▼
酒店建築由 Onion 設計團隊操刀，室內設計就係由 Verena Haller 同 The Standard 團隊負責，景觀由 PLA 規劃。整個設計以現代主義為基調，用波浪曲線同垂直線條令空間有藝術感。綠意貫穿全酒店，從大堂到海邊都可以感受到自然同設計融合嘅氛圍。The Standard Pattaya Na Jomtien 有 161 間客房同套房，包括時尚特大床房、配私人泳池嘅無敵海景套房，仲有面積 322 平方米嘅頂樓套房。每間房都配備雨淋花灑、智能電視、藍牙喇叭同高速 Wi-Fi，仲有園景或海景睇。酒店更同 MozART Advisory 合作，喺庭院展出美國藝術家 Chloé Kelly Miller 嘅裝置作品《Unity of the Double》。
講到酒店亮點，當然少唔到品牌首個海灘俱樂部 Esmé。坐落於綠意海岸線上，結合墨西哥熱情同泰國活力，日落時仲有鑼聲同鼓點，氣氛神秘又有儀式感。餐飲都好有特色，由香脆炸豬皮配牛油果醬，到泰灣鯛魚配蒜香蛋黃；另一間餐廳 Sereia 就係以春武里海鮮文化為靈感，炭烤新鮮本地漁獲同優質肉品，例如香茅魚餅串同蔞葉紅咖哩蟹肉，味道地道。成人限定嘅屋頂空間 Mmhmmm，提供酒吧、彩泥房、冰浴同隱秘泳池。戶外泳池距離大海只有幾步，周圍有躺椅同盛開九重葛，滿滿渡假感。池畔有專人提供冰鎮調酒同 The Standard 招牌飲品。衝浪小屋充滿加州衝浪旅館 feel，展示復古衝浪板，供應冰飲同輕食，係海上活動愛好者補充能量嘅好去處。
Na Jomtien 區向來寧靜，唔同於芭堤雅市中心熱鬧嘅夜生活，呢度海灘平靜又清澈，啱晒想享受慢活假期嘅朋友。浮潛、立槳、揚帆都冇問題，仲可以搭船去附近嘅 Kram 島、Phai 島或者 Larn 島，細白沙灘同清澈海水美到好似明信片一樣。近年，呢區又開始有唔少設計感餐廳、咖啡店同藝文小店進駐，加上穩定嘅海風，仲成為泰國少有嘅風箏衝浪天堂，無論新手定高手都可以玩得好盡興。
The Standard, Pattaya Na Jomtien
地址：8/12 Moo 2, Soi Na Jomtien 10, Na Jomtien, Sattahip, Chonburi 20250
▼ Runhotel 幫你搜尋最平預訂網站 ▼
