【日本旅行生病指南】唔識日文點樣於當地就醫？醫療費用幾多錢？自行買藥有咩選擇？
日本流感自由上年底就有越黎越嚴重嘅趨勢。近期去日本旅行除咗要做好防疫措施，最好更要有埋應對突發病況嘅準備。萬一唔舒服，點樣求醫、邊度睇醫生、收費幾多、唔識日文點溝通等都要提前了解。今次 Runhotel 就整理咗日本嘅求醫指南。一文講解各類求診方式、點搵支援中文嘅醫療機構、成藥推介等。
1. 不同病況求醫
如果只係輕微病症例如發燒、感冒，可以先去當地診所（クリニック）或內科門診睇醫生。一般週一至週六上午時段，大部分城市都有提供處理普通病症嘅診所。睇醫生流程通常係填問診單、量體溫血壓，醫生問診後開處方，然後俾錢（注意通常門診只收現金）。睇完醫生拎收據、處方、診斷證明，再自己去藥局拎處方去買藥。其實日本好多藥妝店或者藥局都有賣成藥，如果症狀係不需求診嘅程度可以選擇直接問藥劑師適合買咩藥（自行購藥指南按此）。
如果病情較嚴重、或者診所已經休診（例如夜晚或者假日），可以去醫院急診。日本大型醫院通常有 24 小時急診部，處理腸胃炎脫水、氣喘發作、嚴重感染等情況。如有需要，可以打日本緊急醫療電話 119 叫救護車（可以請酒店職員或者識日文嘅人幫手）。以下都會詳細講解嚴重病情嘅處理方式。
出行前下載 Google Translate 並提前離線下載日文包相信大家都聽過。如果想準備更充足，小編建議可以印出或截屏常用醫療日語如「肚痛」、「過敏」、「請幫我叫救護車」等。特別提提日本國家旅遊局（JNTO）仲有一張用黎說明症狀、病情時使用嘅「手指會話卡」。各位旅日前可以 Download 定，語言不通都可以同醫護人員進行到簡單溝通。
於日本國家旅遊局（JNTO）官網醫療機構搜尋頁面，旅客可按所在地區、語言（中文旅客選擇「漢語」）同診症類別搵到附近有提供中文服務嘅診所或醫院。建議出發前可以預先搵吓並記低幾間旅遊目的地附近嘅診所或者醫院，以防萬一。尤其帶著長者、小朋友旅行嘅家庭，預先做足功課更安心。
醫療機構搜尋頁面：https://www.jnto.go.jp/emergency/chc/mi_guide.html#:~:text=JMIP
▼搜尋頁面
▼JMIP 認證係由第三方機構負責審查、認證嘅制度，以中立公平立場評估醫療機構對外國患者嘅接診體制。
如果想專人協助，都可以直接打 JNTO 日日本旅遊者多語種熱線（Japan Visitor Hotline）050-3816-2787，請中文服務人員幫手搵最近嘅醫療機構或聯絡救護。
2. 嚴重病情緊急處理
旅遊較常遇到嘅中度至重度病情有腸胃炎、氣喘發作、高燒唔退嚴重感染等，有呢啲情況應及早就醫。有買旅遊保嘅可致電其緊急熱線，部分保險公司可以提供協助、教你處理情況：
- 腸胃炎：如出現劇烈嘔吐、腹瀉並可能有脫水跡象（如頭昏、尿量減少），應儘快就醫補充點滴。平日上午時段可前往內科或胃腸科診所；而症狀嚴重（持續嘔吐至無法進食）、或於晚間時段，建議即刻去醫院急症。醫院可進行靜脈輸液補水、止吐止瀉。等急症時可少量多次喝電解質飲品防止嚴重脫水。
- 氣喘發作：有氣喘病史旅客應隨身攜帶氣管擴張劑，一旦發作即刻休息並使用擴張劑。如果用咗依然無好轉，或出現嚴重呼吸困難、嘴唇指尖呈藍紫色等徵兆，須立即就醫。可請當地人士致電 119 叫救護車。救護人員抵達時儘量以簡單英語或先前提及「手指會話卡」解釋情況。氣喘急性發作在醫院通常會以吸入型支氣管擴張藥或皮質類固醇治療。發作平穩後亦應帶病歷報告返香港複診追蹤病況。
- 高燒唔退嚴重感染：如出現高燒超過 39℃、伴隨劇烈咳嗽、呼吸不順或其他疑似嚴重感染症狀，唔可以拖、要即刻去醫院急診或內科門診。高燒唔退可能需要輸液退燒、抗生素治療或進一步檢查。近期台灣藝人大 S 於遊日期間因流感併發肺炎不幸去世。旅途中感染病情加劇真係唔可以忽視。若自行前往醫院，路上可備用退燒貼、適量補充水分，並戴好口罩避免傳染其他人。
搵日本可用中文嘅醫療機構，可於先前提及嘅日本國家旅遊局（JNTO）官網醫療機構搜尋頁面 Reasearch（詳情按此）。以下小編就整理咗日本各主要城市幾間提供急診服務、並可使用中文 / 中文翻譯服務嘅醫院：
- 東京地區： 聖路加國際醫院（東京都中央區）提供中文翻譯服務、東京醫科大學醫院（新宿區）部分科室有中文支援
- 關西（大阪/京都）： 大阪大學醫學部附屬醫院（大阪府吹田市） 中文溝通無障礙、關西醫科大學附屬醫院（大阪府枚方市）好多科別有中文翻譯
- 其他主要城市： 九州大學醫院（福岡）部分科別有中文人員、名古屋大學醫學部附屬醫院提供多語言服務、札幌醫科大學附屬醫院有中文支援、廣島大學醫院中文溝通便利、沖繩縣立中部醫院提供部分中文協助
前往日本醫院急診通常無需預約，但可能需要等。抵達後需向櫃台講清楚為急診（日語為「救急」）並出示護照。記得語言不通可使用先前提及「手指會話卡」同醫療人員簡單溝通，或求助醫院國際醫療窗口（如有）。如果情況 許可，可先叫酒店前台或同行人士等打電話通知醫院有講中文嘅患者正在前往急診。問吓有冇翻譯協助等，俾院方預先可以做準備。
如果於到埗或準備離境時感到身體不適，日本主要機場都有醫療設施應對。所以有唔舒服可以向機場服務人員求助，佢地可以帶你前往即場治療或安排轉送至鄰近醫院：
- 成田國際機場（東京）：「成田國際空港診療所」（第一航廈中央棟 5 樓、第二航廈 B1 層等地有分部）。門診開放時間通常為 09:00 – 17:00，但緊急情況下 24 小時可接受急症。
- 羽田國際機場（東京）： 羽田機場有醫務室 / 診所（位於第 1 航廈到達大廳 1 樓），開放時間一般為每日 9:00 – 17:00。深夜時段如有急症，機場工作人員會協助聯繫急救資源。
- 關西國際機場（大阪）： 關西機場同樣設有急救醫療中心，提供基本醫療處置及急症協助（24 小時備勤）。醫療中心平日上午有醫師駐診，夜間由當值人員視情況聯絡附近醫院急救。
- 其他機場： 中部國際機場、福岡機場、新千歲機場等均設有醫療設施、與附近醫院有合作機制，可以處理旅客突發病況。
3. 就醫費用
去日本睇門診一般要數千日圓，視乎診療內容而定。普通診察費約 ¥2,000～¥5,000，藥費另計、感冒藥約 ¥1,000～¥2,000 起。一般感冒發燒，診療加藥物費約 ¥5,000～¥6,000，即大約 HK$300～HK$400（按匯率略有浮動）。如果需要額外檢查如血液測試、X 光等，費用會更高。
而急診收費亦較貴，日本大型醫院若無轉診介紹信，初診會額外收 ¥5,000～¥8,000 左右。所以旅客若非緊急情況，可以考慮先去診所以免額外負擔。如真係需要去大醫院急診，情況許何可以先致電確認洗唔洗介紹信或會唔會額外收費。若不幸需要住院每日住院費可達數萬日圓，所以出行前買定旅遊保險正正可以減輕意外情況下財務壓力（詳見下節）。
付款方面，日本診所普遍只收現金、部分大醫院先接受信用卡，而日本 ATM 深夜可能無法提領外幣卡現金。所以旅途中 Runhotel 建議應預留部分現金應急、以備不時之需。
4. 自行買藥指南
如果症狀輕微如低燒或輕感冒，旅客可以考慮去藥妝店買成藥。日本藥妝店有幾款較出名嘅感冒藥：
▼大正百保能感冒藥粉 A（パプロンゴールドA）：呢款係綜合感冒藥，可以舒緩流鼻水、咳嗽、痰等多種感冒症狀，適合初期或輕微感冒。成人及 15 歲以上每次 1 包、每日 3 次；12～14 歲每次 2/3 包；12 歲以下唔適用。
▼新ルル A ゴールド DX α 感冒藥：適合 7 歲以上，對發燒、喉嚨痛、痰咳感冒症狀有效緩解。呢款藥無鎮眠成分，日間服用都唔影響活動。
▼興和感冒藥 コルゲンコーワ IB 錠 TXα：呢款強效感冒膠囊含抗炎成分，可以全面緩解發燒、咳嗽、喉嚨發炎、鼻塞等感冒症狀。只適合 15 歲以上，含有輕微抗組織胺成分可能會令人眼瞓，所以食完要避免駕駛。
以上藥品都係日本藥妝店常見嘅感冒藥種。買藥時可以同藥劑師講自己嘅症狀，佢哋會推薦適合嘅藥品。用藥時要留意年齡限制同禁忌，例如有啲感冒藥唔適合 12 歲以下小朋友、孕婦、慢性病人士等。仲有唔好混合服用唔同品牌嘅 感冒藥，因為有啲成分可能重複、容易超量。一般嚟講食咗藥 2 – 3 日應該會見效，如果無好轉或病情加重就要考慮睇醫生啦！
5. 旅遊保險建議
正值而家流感咁嚴重，遊日前真係最好買好旅遊保險、買之前亦要睇清除不受保障嘅病症。提提大家，特別係買咗旅遊保記住 Keep 單、Keep 單、Keep 單！建議養成隨手收集文件嘅習慣，包括收據、處方、診斷證明等文件都可能係保險索償時用到嘅證明。缺少任何一張都有可能影響賠償過程。以下同大家介紹幾間香港常見保險公司：
AIG 美亞「旅遊智易保」
- 海外緊急醫療費用保障高達 HK$150 萬
- 住院現金津貼（每日定額給付）
- 回港後覆診費用保障
- 24 小時全球緊急支援熱線可於海外協調醫療運送或緊急遣返、或緊急支援定醫療建議。AIG 團隊包括專業醫生及護士會係支援熱線中提供適當既意見及協助
透過以下連結預訂可享 8 折，去日本 4 日個人旅遊保折後只需 HK$23.2、家庭計劃折後都只需 HK$47.2，購買家庭計劃不限 17 歲以下子女，啱哂大家庭。
8 折購買網址：https://buy.aig.com.hk/aigb2c/tws/View/Travel/b2c/
了解詳情：https://www.runhotel.hk/AIG10off
中銀「環宇智選旅遊保障計劃」
- 醫療費用保障高達港幣 150 萬元包括門診、手術費及醫生費用
- 提供回港後 3 個月內覆診費及創傷輔導保障
- 每日住院現金津貼
- 人身意外雙倍賠償高達港幣 400 萬元
- 24 小時緊急支援服務可提供醫療轉介、住院按金擔保等協助。
- 受保人年齡至 80 歲（適用於單次旅程計劃）
透過以下連結預訂可享 75 折，個人最平 HK$90 起、全年旅遊保 HK$1,317 起。
75 折預訂網址：https://www.bocgins.com/untrv/index.html?url=html/home/home.html&product=1002&channel=RHotel
了解詳情：https://www.runhotel.hk/boc-insurance
安聯旅遊保險
- 高達 2,000,000 港元醫療費用保障
- 海外住院每日現金保障
- 覆診醫療費用
- 全球網絡每日 24/7 為您提供緊急支援
透過以下連結預訂可享 6 折，以日本 5 天遊為例個人最平 HK$53 起、全年旅遊保 HK$990 起。
6 折預訂網址：https://booking.allianz-travel.com.hk/B2C/TRAVEL/
了解詳情：https://www.runhotel.hk/allianz-travel-insurance
6. 旅遊保一般索償流程
旅遊保險一般都係「先自付後理賠」，即係旅客喺日本睇醫生要自己先俾錢後、返香港再向保險公司申請賠償。部份保險如事前聯絡佢哋嘅 24 小時緊急援助中心，住院等重大醫療費用可能可以安排免找數、但都要醫院接受，實際上大部分情況都係要自己先俾錢。申請賠償具體需要提供咩文件同程序視乎你買嘅旅遊保險計劃，以下係一般理賠流程同注意事項俾大家參考：
① 就醫當下：
喺日本睇醫生時記得攞齊所有單據，包括診所或醫院發出嘅收據（正本發票要列明所有治療項目及金額）及診斷書或醫療報告。診斷書上一定要有病人姓名、診斷結果（病名）同治療日期，並由主診醫生簽名蓋章。如果有處方或藥局購藥收據，都要一併保留。有啲醫院開正式診斷證明書係要額外收費，呢筆錢通常保險唔會賠，但為咗順利理賠建議都係照出。部分醫院提供雙語診斷書，如可以嘅要求英文診斷證明、可以方便保險公司審核。
如果需要住院或進行較大規模治療金額較大，建議即時通知保險公司 24 小時援助熱線、確認有冇特別理賠手續或者醫院可唔可以直接向保險公司收費等。有啲保險公司如果住院前無事先通報，可能會有限制賠償。所以及早報備、提交理賠申請時再附信說明經過可令過程對雙方清晰順利。
② 回港後準備資料：
返到香港後記得盡快準備理賠申請、並喺保單規定期限內（通常係 21 至 30 日內）提交，以免影響索償。以下係一般需要準備嘅文件：
- 理賠申請表：可向保險公司索取或上官網下載，填妥個人資料、保單號碼、事故經過及索償項目等。
- 醫生診斷書或醫療報告：如原件係日文，建議附上翻譯或重點說明、以免影響審核進度。
- 醫療費用收據正本：包括診金、檢查費、藥費等所有收據原件，記得影印備份以防遺失。
- 機票及出入境證明：登機證存根、電子機票行程單或護照出入境蓋章頁，受保人姓名需與保單及登機證一致。
- 其他相關證明：意外受傷需提供當地警方或相關單位嘅報告（如報警紀錄）；旅程更改可提交航空公司延誤證明等
③ 提交申請：
多數香港保險公司提供多種遞交方式，包括線上提交、電郵、郵寄紙本或親身遞交至客戶服務中心。線上提交較快捷亦有紀錄，但原始收據正本通常仍需郵寄或日後備查。所以小編再次建議先行掃描或影底佢保存電子備份，於寄送文件時最好使用掛號郵件以免遺失。
④ 理賠審核與獲償：
申請後審核處理時間視乎公司政策、一般約 2 至 4 週內完成，如果超過指未時間都未收到消息，一定要密切跟進。提交申請後 2 個星期左右可主動聯絡保險公司查詢進度，確認係咪收齊曬文件。
若資料齊全審批通過，保險公司會按照你選擇嘅支付方式發放賠償。若資料不足或需要核實，可能會要求補交文件或提供額外資訊。
收到理賠結案通知後，要確認清楚賠償金額係咪同申請內容相符。如有任何拒賠或調整，保險公司會提供原因（例如該項目屬於保單除外責任）。如果對結果有異議，可以聯絡保險公司客戶服務進一步查詢或提出申訴。
7. 其他實用建議
- 隨身帶重要資料： 出門可應該隨身攜帶一張寫住個人重要醫療資訊嘅小卡片（最好係中英日對照），內容包括過敏藥物、舊有病史、所買保險嘅保單號碼、24 小時緊急聯絡電話等。萬一發生突發情況或者失去意識，其他人就可以根據卡片幫你搵到啱嘅治療方法。另外都要隨身攜帶護照，以便就醫時需要提供護照證明身份。如果有保險公司醫療卡都可以帶住。
- 自備常用藥品：自己帶定食開嘅退燒止痛藥、腸胃藥、過敏藥、眼藥水等，一方面自己用得安心、另一方面病況輕微可以食咗自備藥觀察情況先決定洗唔洗睇醫生。
- 如果發現自己唔舒服到必須求醫，唔好等！最好喺上午時段去診所睇醫生、唔好拖到夜晚或者週末。到時可能淨係可以去急診，會唔方便同埋貴。仲有部分買藥嘅地方並唔係 24 小時營業，建議盡早去完診所拎處方去買藥。
