【東京迪士尼有新酒店2026】舞濱全新最大級750房，免費接駁巴士＋步行可達迪士尼線，每晚房價最平唔使一千！
去東京迪士尼玩，住邊間酒店最方便又最有氣氛？2026 年 2 月 13 日，全新開幕嘅 ザ ロイヤルパークホテル 舞浜リゾート 東京ベイ（The Royal Park Hotel 舞濱 Resort 東京灣）正式登場，坐落於東京迪士尼度假區核心舞濱地段，由三菱地所酒店及度假村打造，一開幕即成為品牌旗下最大規模酒店之一，全館多達 750 間客房，主打「TRAVELOGUE＝異國旅程回憶」概念，想去迪士尼旅行又多一個住宿選擇喇！
▼ Runhotel 幫你搜尋最平預訂網站 ▼
750間客房規模最大級
舞濱一向係東京迪士尼住宿最熱門戰場，而今次呢間全新酒店以「Nostalgic」、「Exotic」、「Resort」為關鍵字打造空間設計，從一入門口已經有種走進異國故事書世界嘅感覺。酒店外觀以高貴 Royal Blue 為主調，14 層高建築非常搶眼。大堂設有挑高空間與大型木樓梯，配合來自世界各地嘅繪本、玩具同藝術擺設，營造出環遊世界嘅氛圍——就算迪士尼玩到夜晚返嚟，都可以繼續沉浸喺旅行故事之中。全館客房分為 2 樓嘅「Concept Room」主題樓層，以及 3 至 13 樓嘅「Standard Room」標準樓層。沉浸式Concept Room（2樓限定）好似走入童話場景一樣，充滿異國情調，分為三大主題：Arabian（阿拉伯風）、Safari（野性草原風）及Ocean（海洋世界）。無論你鍾意神秘沙漠宮殿，定係動物探險風，甚至海洋冒險感覺，都可以揀到啱心水嘅主題。特別適合親子家庭或者閨蜜／朋友Group入住，打卡感滿分。
標準樓層設有四款以世界海洋色彩為靈感嘅主題：Greece Blue（希臘藍）、Asian Emerald（亞洲翡翠綠）、Indian Jasmine（印度茉莉白）、Mexican Sunflower（墨西哥向日葵）最大亮點係全房型均配備電子微波爐，買宵夜返酒店叮熱食，或者幫小朋友加熱嬰兒食品都非常方便。房內設有大餐桌，非常貼心實用，呢點喺舞濱酒店之中相當少見。
2 樓餐廳「THE COMPASS」免費接駁巴士＋步行可達迪士尼線
酒店 2 樓餐廳 THE COMPASS 主打「世界の食を旅するレストラン」概念，提供多國料理自助早餐。空間明亮寬敞，設有大量梳化座位，適合一家大小慢慢歎早餐。由亞洲到西式熱食都有，為第二日迪士尼行程補充能量。酒店交通位置極具優勢：JR京葉線「舞濱站」車程約 5 分鐘，同時提供免費接駁巴士往返舞濱站（時間表可按此），步行可達迪士尼 Resort Line「東京迪士尼海洋站」。無論你玩東京迪士尼樂園定迪士尼海洋，都非常方便。
房價
大家當然最關心房價，根據 Trip 網站顯示，3 月頭部份日子房價 HK$925，但其日子房價大約千一至千五，星期六大約由二千起。
ザ ロイヤルパークホテル 舞浜リゾート 東京ベイ（The Royal Park Hotel 舞濱 Resort 東京灣）
地址： 13 番 1 Chidori, Urayasu, Chiba 279-0032日本
▼ Runhotel 幫你搜尋最平預訂網站 ▼
(adsbygoogle = window.adsbygoogle || []).push({});