【芬蘭自由行攻略】簽證、最佳月份、必去城市、物價、治安、北歐遊建議
芬蘭簡介
說起芬蘭，大家可能即刻就會想到聖誕老人、森林精靈同極光。呢個歐洲森林覆蓋率最高嘅國家，已經連續 8 年蟬聯「全球最幸福國家」第一位。作為旅遊達人，又點可以唔去了解一下芬蘭人幸福背後嘅秘密呢？小編花咗一個月時間，遊走芬蘭唔同城市同大自然，親身感受當地慢活又舒服嘅幸福感。今次一於跟住小編，一齊深入認識芬蘭，分享屬於北歐嘅幸福節奏啦！
入境芬蘭
計劃前往芬蘭旅遊，首先要了解清楚入境須知。芬蘭屬於歐盟申根地區，香港人只要持有特區護照或 BNO，便可免簽證入境，最多逗留 90 天，而護照有效期必須至少剩餘 3 個月或以上。
另外需要留意，由 2026 年第四季起，所有免簽證入境申根地區嘅旅客，需額外申請 ETIAS（歐洲旅遊資訊及授權系統）先可入境。每次申請費用暫定為 7 歐元（約港幣 $59），有效期為 3 年。計劃 2026 年或之後前往芬蘭嘅朋友，記得預早安排。
前往芬蘭最佳月份
芬蘭四季分明，一年四季都各有特色，大家可以按自己想睇嘅景色同體驗嘅活動，揀選最合適嘅出發時間。
春夏季（4 月至 8 月）
由每年 4 月開始，芬蘭正式踏入春季，積雪慢慢融化，日照時間亦逐漸延長，一般晚上 9 點左右先日落，部分地區甚至會出現「午夜太陽」現象。春夏季非常適合進行戶外活動，例如行山、划艇、釣魚、露營等。
氣溫方面，春夏季大約介乎 10°C 至 22°C，越接近北部氣溫會稍為偏低，但整體感覺清爽宜人，非常舒服。
秋冬季（9 月至 3 月）
每年 9 月至翌年 3 月，芬蘭就會踏入秋冬季。呢段時間景色同春夏完全唔同，大地鋪滿白雪，日照時間極短，一般每日只有 4 至 6 小時，部分北部城市更會出現「極夜」，即 24 小時都睇唔到太陽。
不過，秋冬正正就係觀賞極光嘅最佳季節，同時亦係進行各種雪地活動嘅黃金時間，例如雪地摩托車、破冰船、冰釣、雪橇體驗等等，亦係探訪聖誕老人最理想嘅季節。
秋冬氣溫相當寒冷，大約介乎 0°C 至 -13°C，越向北走溫度會越低，選擇呢個時候出發嘅朋友，記得準備足夠禦寒裝備。
機票與航空公司選擇
由香港出發，可以乘坐芬蘭航空直航前往芬蘭首都赫爾辛基，飛行時間約 14 小時。芬蘭航空屬於傳統航空公司，但價格相對親民，來回經濟艙機票最平約港幣 $4,000 左右，旺季或較高價位亦大約 $8,000 以內，對比其他歐洲直航航線算相當抵玩。
而且芬蘭航空多數使用空中巴士機型，即使長途飛行，整體舒適度亦有一定保證。
如果時間配合，或者想順道遊覽其他歐洲國家，亦可以選擇轉機航線。由香港出發，較常見轉機城市包括德國法蘭克福、法國巴黎或土耳其伊斯坦堡。不過整體價錢同直航相若，除非打算歐遊多國，否則小編會建議直接選擇直航會更省時省力。
預留時間及必去城市
首次到芬蘭自由行，小編建議預留至少 10 日或以上（包括來回飛行日）。芬蘭交通系統完善，主要城市同景點都可以透過公共交通工具輕鬆到達。以下係小編精選嘅幾個芬蘭必去城市，10 日左右就可以玩得相當全面。
赫爾辛基 Helsinki
赫爾辛基係芬蘭首都，同時亦係香港直航抵達嘅主要城市，自然成為行程中不可或缺嘅一站。城市內匯聚咗多個芬蘭代表性建築，包括赫爾辛基大教堂、岩石教堂、靜默教堂、西貝流士公園、芬蘭堡等。
除咗建築景點，赫爾辛基老農貿市場亦係必到之處，呢度可以食到被譽為「世界級」嘅三文魚湯，暖胃又滿足。另外，去芬蘭又點可以唔試桑拿？芬蘭桑拿數量比人口仲多，而赫爾辛基更有全國最大型嘅桑拿設施，絕對唔可以錯過。
赫爾辛基城市面積唔大，大部分景點集中喺市中心，步行或者搭短程電車已經可以到達。一般預留兩日左右已經相當充足。
▼赫爾辛基大教堂為當地最著名的地標之一
羅瓦涅米 Rovaniemi
講到芬蘭，當然一定要探訪聖誕老人！位於芬蘭北部嘅羅瓦涅米，就係全球唯一官方認可嘅聖誕老人村所在地。由赫爾辛基出發，可以選擇火車、巴士或內陸機前往，交通非常方便。
喺聖誕老人村內，除咗可以同聖誕老人合照，仲可以參加多款特色活動，例如哈士奇拉雪橇、馴鹿雪橇、精靈訓練學院、追極光等，行程相當豐富。而村內亦設有北極圈分界線，遊客可以親身踏入北極圈，仲可以購買北極圈證書作紀念。
活動種類多到數唔晒，小編當時用咗兩日都只完成到大約三分之二，想玩得更全面嘅話，建議預留至少三日。
除咗聖誕老人村，羅瓦涅米本身亦設有一個大型動物園，可以見到多款極地動物，例如雪地貓頭鷹、雪狐、北極熊等，非常值得一遊。
▼全球唯一官方聖誕老人村就位於芬蘭羅瓦涅米
凱米 Kemi
凱米可能唔算太多人認識，因為城市規模細小、人口稀少，平日景點亦唔算多。不過一到冬季，就會成為芬蘭相當受歡迎嘅旅遊目的地之一。
原因在於每年冬天，凱米都會興建大型冰雪城堡，部分年份更可以入住冰酒店，仲有破冰船、冰釣等特色冰上活動，非常難得。另外，當地亦設有全透明玻璃屋酒店，係觀賞北極光嘅理想住宿選擇。
由於冬季非常搶手，無論活動定住宿，大部分都需要提早至少一個月預約，而且多數不接受即場 walk-in，記得事前安排。小編當時喺凱米停留咗兩日，參加破冰船活動同參觀冰雪城堡，時間相當充裕。
▼凱米 SnowCastle365 每年冬季都會打造大型冰雪城堡
波爾沃 Porvoo
波爾沃係芬蘭第二古老嘅城市，擁有接近 800 年歷史。老城區坐落於山坡之上，一排排紅色木屋沿河而建，最初用作儲存由各地運來嘅貨物倉庫，現時已成為波爾沃最具代表性嘅景觀。
城內最熱鬧嘅商店街同樣由色彩繽紛嘅小木屋組成，行走其中，彷彿置身童話世界。波爾沃亦被稱為「詩人之城」，過往曾有不少藝術家同詩人居住，其中芬蘭國寶級詩人 J. L. Runeberg 的故居亦設於此，現已開放作博物館參觀。
▼紅色小木屋承載著芬蘭歷史與文化（圖片來源：myhelsinki）
芬蘭北歐遊建議
芬蘭地理位置相當方便，位於多個北歐國家之間，西面連接瑞典，南面可前往愛沙尼亞與丹麥，北面通往挪威，因此非常適合作為北歐多國旅遊嘅起點。
芬蘭・瑞典「雙子城」
所謂「雙子城」，係指同時橫跨芬蘭同瑞典邊境嘅城市。呢個城市一邊屬於芬蘭 Tornio，另一邊則係瑞典 Haparanda，中間只隔住一條小河，過橋一秒就可以跨國，非常特別。
雙子城亦係三文魚棲息地，夏季時分吸引大量戶外愛好者前來，可以進行釣魚、露營、行山等活動，適合喜歡自然風景嘅旅客。
▼左邊係芬蘭，右邊係瑞典，一秒體驗跨國
乘船前往愛沙尼亞
由赫爾辛基出發，只需約 2 小時船程，就可以抵達波羅的海三國之一愛沙尼亞首都塔林。不少旅客都會選擇即日來回，輕鬆多玩一個國家。
塔林保留大量中世紀建築，舊城區更被列為世界文化遺產，走入城內彷彿一秒穿越回中世紀歐洲，歷史氣氛濃厚，非常值得納入行程。
▼塔林古城城牆為世界文化遺產之一
芬蘭物價
芬蘭以歐元作為貨幣，相比其他北歐國家，整體物價算係中等水平。例如赫爾辛基老農貿市場中最有名嘅三文魚湯，大約 15 歐元一碗，其他街頭小食一般介乎 6 至 7 歐元。
不過，小編認為芬蘭最貴嘅開支其實係熱門旅遊活動，例如聖誕老人村嘅雪橇體驗約 30 歐元起，而凱米破冰船活動更高達 300 歐元以上。預算有限嘅朋友，建議事前做好規劃，按興趣取捨。
在芬蘭購物，大部分商店都可以辦理退稅，只要單筆消費滿 40 歐
