【友邦香港國際熱氣球節 – AIA Balloon Run 熱氣球跑】9 月回歸！青年組/公開組/先進組/親子組，得獎可玩熱氣球繫留定點飛行！
「友邦香港國際熱氣球節」將於 2025 年 9 月再度回歸！今年更特別加入慈善項目——AIA Balloon Run「友邦熱氣球跑」。活動不但可以邊跑邊欣賞維港晨曦靚景，仲可以喺賽後參與繽紛嘅氣球派對，將運動、玩樂同公益完美結合！所有收益扣除必要開支後，將撥捐香港外展訓練學校，用於培育本地青年，幫助裝備未來。
多個組別 得獎可獲熱氣球繫留定點飛行體驗
「友邦熱氣球跑」設有 5 公里、3 公里同 1 公里賽程，適合唔同年齡層同體能人士參加。個人組分為青年組（15-17 歲）、公開組（18-40 歲）及先進組（41 歲或以上），而親子組就特別為一家大細而設，小朋友只要年滿 5 歲就可以同父母一齊組隊參賽，分為 5-8 歲及 9-14 歲兩個組別。而每個組別嘅冠、亞、季軍將可獲得一次熱氣球繫留定點飛行體驗，參加者將會喺安全受控環境下升至 10 至 20 米高空，親身感受升空嘅震撼同維港靚景。
1公里路線：最啱親子參與，沿添馬公園同海濱長廊輕鬆暢跑，飽覽270度維港美景。
3公里路線：適合打卡達人，途經會展同金紫荊廣場，仲可以喺觀景台影靚相。
5公里路線：挑戰體能之選，由中環海濱出發，跑過灣仔碼頭再折返，地標景點一網打盡。
熱氣球派對
完成比賽之後，參加者可以免費參與中環海濱舉行嘅熱氣球派對。現場會有熊貓、恐龍等造型可愛嘅熱氣球展出，仲有熱氣球原理小教室、手作攤位、臉部彩繪、派對編髮、泡泡表演同扭扭氣球等等，啱晒一家大細投入節日氣氛。
────── 最新文章 ──────
