疫情去唔到旅行的期間，唯一可以真正感受到離開香港的遊輪公海遊，2021 年 11 月，我就去咗 4 日 3 夜的皇家加勒比郵輪海洋光譜號公海遊，入住了海景露台房，分別試咗 4 間免費餐廳與房內早餐，以及 4 間收費餐廳及酒吧，而船上主打的遊樂項目，包括甲板跳傘、南極球彈床、觀景台北極星等亦都有一一玩過晒，好多人都問好唔好玩？又值唔值？ 一句總結，滿意舒服，因為皇家加勒比郵輪行程中真係會出去公海，所以真係有啲啲旅行既感覺，當去一個 Hea Trip 唔錯，同埋船上而家有人流管制，唔會太多人，食野玩野唔洗排太耐。如果大家第一次去，今次就等我幫大家講解一下今次事前準備、上船安排、船上玩樂及餐飲設施，到最後落船流程之中的小貼士同注意事項，如果仲有咩未解答到大家，都歡迎大家留言發問，答到都會幫手答。

邊度訂郵輪公海遊有折？

好多人問邊度訂有折先，你地都係想知邊度有平啫，近期成日做優惠有 KKday、Klook、或專業旅運，大家可以去以下網址格下價，邊度平就去邊度訂

KKDAY 預訂網址：https://www.kkday.com/zh-hk/product/120063?cid=2058&ud1=Cruisecation
KLOOK 預訂網址：https://www.klook.com/zh-HK/activity/58091-2-3-4-night-hong-kong-cruise-royalcaribbean-spectrumoftheseas/?aid=16&aff_ext=Cruisecation
專業旅運預訂網址：https://www.texpert.com/tw/cruise/seacation.aspx?page=1?a_aid=RH

事前準備

1. 開航前 14 天前需完成 2 劑新冠疫苗接種(預約接種疫苗)
   上船前需要出示接種疫苗的紀錄，大家可選擇出示「智方便」APP 的電子針卡，或攜帶接種疫苗紀錄的正本。如果你仲未打針，想去就盡快去打針先。
2. 開航前 48 小時前需要完成核酸檢測(預約社區檢測中心)，並取得核酸檢測陰性報告(不接受深喉唾液檢測報告)
   預約時記得揀返報告用於出行，費用為 HK$240，報告大約會於一天後經 SMS 發送給大家。提埋你地，如果想提早網上辦理登船手續，記得要填埋護照資料再帶埋護照去做檢測，使用身份證登船的話，就需於到達郵輪碼頭後方可辦理登船。
3. 開航前 24 小時前使用皇家加勒比郵輪 APP 完成登船手續及「健康與安全」的健康申報問卷調查
   在出發之前，旅客會收到皇家加勒比郵輪發出的 email 通知大家下載其郵輪 APP，唔止用於 Online Check-in 及健康申報，仲可以用於查看行程、各餐廳餐牌及開放時間、郵輪架構及預約船上活動，基本成個行程都會用到呢個 APP，所以一定要下載啊！

上船安排

登船當日，建議大家比登船時間提早兩小時去到啟德郵輪碼頭，有需要的可以先去託運行李，不過託運的行李要等到夜晚先拎得返 （如果如無必要就唔好託運喇，搵黎攪）。跟住準備好所需證件、疫苗及核酸證明到登船大堂 A 交給工作人員檢查，檢查齊全就會拎到張證明卡，之後帶埋證明卡同身份證明文件再上一層，到櫃檯辦理登船手續、使用「安心出行」登記資料及拍攝保安相片，完成 Check-in 後會獲得登船證、登船號碼及追蹤手帶，最後坐低等叫到你的登船號碼，再去排隊通過安檢，以及香港入境處、海關及衛生署的出境檢查，就可以成功上船啦！上到船之後，記得要跟指示去聽埋安全救生教學先好上房啊 （雖然係悶，但一定要去聽）。

郵輪公海遊執行李清單

去郵輪同平時去旅行唔同，為安全起見有大部份會發熱電器及需要充電的保健理療物品都嚴禁帶上船，包括電熨斗、拖板、瘦身帶、理療帶等，幫大家問過，電髮棒係可以帶上船嘅！另外，新鮮水果、肉類、乳製品、高頻無線對講機設備、任何已開封的食物及液體、葡萄酒及香檳以外的酒類都係唔可以帶上船㗎，我阿媽最鐘意叫我帶個橙上船食，即刻同佢講唔可以，如果唔係佢實塞俾我。咁其他必備及需要自備的行李清單可參考如下：

• 2 劑疫苗接種記錄
• 2019 冠狀病毒病 PCR 核酸檢測陰性證明（出發前 48 小時内進行）
• 香港永久性居民身份證（11 歲或以上）
• 香港特別行政區回港證 或 香港永久性居民身份證及護照（11 歲以下）
• 銀包（信用卡、美金）
• 旅行萬用插頭／兩腳轉插
• 牙膏、牙刷
• 淋浴拖鞋
• 梳子
• 剃鬚刀
• 個人衣物
• 泳衣／泳褲
• 運動衫
• 護髮素
• 女性衛生巾
• 暈浪丸

房間設備及概覽

今次住的是海景露台房，房內有一張大床、書枱連梳妝枱、長梳化、兩個衣櫃等，提供風筒、電熱水壺、迷你雪櫃、夾萬、拖鞋、消毒搓手液、電話及電視等用品，其中電視只可以睇到 bbc、cctv，並無香港電視台睇。另外，仲有提供即沖咖啡、茶包及人頭份量樽裝水，留意樽裝水只會提供一次，唔會再補充，乘客可以帶定不超過 500 毫升的水樽上船，可以去餐廳免費裝水，又或者到各間酒吧購買單枝樽裝水或水套餐。插頭方面，床側邊同書枱位都有提供，不過只有兩腳扁腳、兩腳圓腳同 USB 插頭，所以一定要帶旅行萬用插頭上船。而浴室就有洗髮露沐浴露二合一、洗手皂提供，比較在意沐浴用品的話，就最好自備啦。另外，每間房都有專屬管家於每日早晚提供兩次執房服務。

▼船卡就放喺門口房號的位置

▼海景露台客房

▼長梳化夠瞓直晒成個人㗎！

▼露台有兩張躺椅及一個茶几

▼露台望出去景觀 （特登打側影俾大家睇，因為正面只係見到一片海）

▼書枱連梳妝枱，塊鏡仲有得開燈，方便女士們化妝。

▼枱面有提供口罩同消毒搓手液，不過個口罩係冇任何包裝，大家斟酌使用啦。

▼房內樽裝水，船上有售 Evian 礦泉水，單枝 US$2.95，或可選擇購買 1 公升 Evian 礦泉水套餐，12 枝售 US$39，24 枝售 US$39，唔想俾錢就乘乘地去餐飲裝水喇…..

▼書枱位有提供兩腳扁腳、兩腳圓腳同 USB 插頭

▼另外床頭位都有插頭

▼另一個床頭邊就有電話

▼書枱隔離的高櫃上面有電熱水壺、即沖咖啡及茶包、茶杯及茶匙

▼櫃筒內有風筒及盒裝紙巾

▼最底一格櫃就有迷你雪櫃，大家可以將自備的水、茶或酒等放喺雪櫃到雪， 但記得每人可以隨身攜帶上船的非酒精飲料單瓶不得超過 500 毫升，每房上限 12 瓶，而葡萄酒或香檳單瓶不得超過 750 毫升，每房上限 2 瓶，而且只可跟身帶上船，不可託運。（睇得出郵輪公司用盡所有方去賺你既飲品錢…. 所以在免費餐廳食飯時就記得飲多啲水喇）

▼電視仲有得租借電影睇，每次租借 US$11.99，合理價錢唔算貴

▼衣櫃內的衣架量非常充足，而且有提供房內拖鞋

▼另一個衣櫃內有夾萬

▼近門口位置有全身鏡

▼浴室

▼夜晚有開床服務

郵輪有咩收費同免費項目？

郵輪上玩樂項目超多，不過當然唔係全部免費，詳細收費及免費項目可參考下文列點。俾多個小貼士大家，上船前開 APP 睇定有咩想玩想食，入到房就要即刻預約，根據經驗第一日就已經會預約滿晒之後幾日的餐廳位同熱門遊玩項目。另外，之後幾日的航程中，亦有可能會突然開放新的活動可以預約，所以大家都可以不時入 APP 睇睇有冇新嘢玩。

免費項目

先講皇家加勒比郵輪既免費項目先，因為太人問唔加錢船上可以有詳玩，就等我逐樣講：

▼甲板衝浪有 12 米長摸擬器，潮浪長達 40 呎，仲有 30,000 加侖的洶湧水花迎面撲來，比你感受到海洋上沖浪感覺，而且其位於船頭位置，可以睇住一望無際的海景玩衝浪，好爽！

▼攀石活動都係免費唔洗錢既，所以都好搶手，好多人預約，有 40 英尺高！

▼海上多功能運動館內提供的碰碰車、足球機、互動式遊戲機「探秘水世界」、藍球、兵兵球、羽毛球等都是免費的，呢啲活動都消磨到幾個鐘。

▼今次我地住左 3 晚，有兩晚都有免費表演睇，皇家大劇院表演《魅舞今昔》及《光譜奇俠》都是免費，上次去的時候就有得睇《魅舞今昔》，呢個表演除咗欣賞台上各位的好歌喉同整齊舞步之外，每一幕的靚衫都好值得一睇！

▼270 度景觀廳表演《絲綢之路》，好有故事性，而且給合了多個元素，可以一次過睇到晒小提琴 Solo、小提琴與中國鼓合奏、歌舞表演及體操雜技表演，非常精彩！

▼室內及室外游泳池都係免費既，兩個泳池側邊有池畔吧。

▼小朋友可以去水上樂園，設有的水滑道、水砲、噴泉及泳池等，適合小朋友玩。

▼ 船上有一個去日光浴場，位於船頭位置，呢個係一個透明玻璃位置，俾大家曬吓太陽，Hea 吓休息下，環境好舒服，所以呢個免費地方都有好多人黎打卡。

▼「明星時刻」是開放式卡拉 OK 場，都有唔少中文舊歌唱㗎！唱番兩句都係免費既

▼家長帶小朋友黎驚佢地好悶，其實一啲都唔悶，郵輪上有一個叫「海上歷奇青少年中心」，提供託管所、兒童遊樂設施、科學實驗、劇院演出和航行者體驗等，由 6 個月到 14 歲小童都可以喺到搵到啱玩的設施。

▼青少年迪士科，15 至 17 歲的青少年就可以嚟參加主題派對、唱卡拉 OK、跳舞等等。

▼其他於悅音廳、270 度景觀廳等場地舉辦的活動，如電影欣賞、樂隊表演、猜歌遊戲、手工藝工作坊、單身聚會等等都係免費㗎！

收費項目

講完咁多免費項目，如果你覺得夠玩，上到船真係無乜特別洗費，咁而家就講講收費既有咩項目。

▼南極球：彈床 US$10/次；配備 VR 眼睛加彈床 US$15/次。我過我地上船當日，由於 VR 需要維修冇開放。

▼北極星：US$40/次。獲健力士世界紀錄「最高海上觀景台」稱號，360 度都係玻璃窗，開船之前玩過，可以睇到晒啟德碼頭同維港風景。

▼甲板跳傘：US$40/次。玩之前會有示範教學片睇，每人可以玩兩次，每次約 2 分鐘，玩過真係好有飛緊嘅感覺！但女士們記得要帶條橡根去扎好頭髮先玩，如果唔係就會好似我咁頭髮打晒撠…

▼SPA：US$107/50分鐘 起

▼兒童電子遊戲室提供的遊戲機都是要收費的，夾公仔機、音樂節拍類、槍擊類、賽車 Game 都有齊，每玩一次約 US$2 至 US$2.5。

▼ 甲板衝浪亦設有 3 個不同價格的私人課程，分別為 US$69、US$345 及 US$552，有興趣的話可以提早在出發前經網頁預約。

排隊時間

以上有部份免費項目唔需要預約，只要在現場排隊就可以玩得到，分別是甲板衝浪同攀石，朝早去甲板衝浪都見坐滿兩排人等住玩，而傍晚時段人就相對較少，之前聽去過既人講過，差唔多要等半個鐘先有得玩，所以建議大家都係帶定外套去等位比較好。攀石方面，行過幾次都見只得幾個人排隊，平均 15 分鐘內就應該可以玩得到。

餐飲體驗

好多人都關心餐飲，等我一一講下我地上次用餐安排同體驗，之前一共試咗 4 間免費餐廳及房內早餐，包括帆船自助餐廳、主餐廳、索倫托餐廳、海上多功能運動熱狗屋，以及 4 間收費餐廳及酒吧，包括奧利弗義大利餐廳、大董意境坊、泉．日式餐廳。船上免費餐廳都不需預約，可以隨時入座進餐，其中免費的帆船自助餐廳雖然冇海鮮食，不過就有唔少燒烤美食提供，而且中西式食品都有，如燒牛扒、即切牛肉、口水雞、西班牙海鮮飯等等，環境亦比較開揚，可以被兩邊海景包圍，而且整個旅程中會有一日提供特殊菜式。之前聽人講，郵輪既自助餐好難食，特別係星夢郵輪個自助餐勁難食就出晒名，皇家加勒比郵輪個自助餐又 OK 喎，雖然無得同酒店比，但起碼食入口唔叫難食，已經好好，曾經有人報料指見過皇家加勒比個自助餐有龍蝦提供添！我地體驗嗰日就唔見。

另一個免費的主餐廳提供菜式更為精緻，每枱仲會有專屬服務員款待，都幾有食緊 Fine Dining 感覺，而體驗當晚叫過的炙烤龍蝦尾都好正，真係有手掌咁大，而且口感彈牙。最正係餐廳會每晚亦都轉新的晚餐餐牌，即使日日去食都唔會悶！想知每間餐廳詳細有咩好食就睇下文啦～

免費餐廳
▼帆船自助餐廳只有提供早餐及午餐，分別於 7:00am – 11:00am 及 11:30am – 3:00pm 供廳，而最後一日的早餐時間則由 6:00am – 9:00am 供應，所以唔使擔心咁早落船會冇早餐食。

▼門口側邊就有洗手位，所有食客入餐廳之前要先洗手，入到餐廳之後，大家想食咩就話俾職員知，等職員幫你夾，以保證衛生。

▼餐廳位於 14 樓，兩邊都係落地大玻璃，可以被海景包圍住慢慢食～

▼自助早餐有薯餅、煙肉、腸仔、鬆餅、丹麥酥、冬甩、乳酪、即叫即整奄列等等，而中式的粥、炒麵、炒粉麵飯以及即煮麵檔

▼而自助午餐就有燒牛扒、薯角、沙律、西班牙海鮮飯等等，而中式的就有口水雞、炒牛肉、春卷、炒粉麵飯及各種蒸包等，同樣都有即煮麵檔。

▼仲有水果同甜品

▼飲品吧有提供咖啡、茶、果汁等飲品

▼每次航程都會有一日的自助午餐提供特別菜式，而第三日就見到有朱古力噴泉，聽其他去過的讀者講仲有見過提供龍蝦㗎！

▼坐窗邊位望住海景食最正！

▼主餐廳有分開上下兩層，於早午晚三餐時段都有開放，客人可以按房卡上「Dining」一項寫著的樓層，到相應的甲板用餐。

▼主餐廳每晚餐牌都唔一樣，晚晚去食都會有新鮮感！體驗當晚就有以下的菜式可以揀，中西式都有齊，而且全部都可以任點任食。

▼主菜就有炙烤龍蝦尾及烤牛里脊肉，其中龍蝦真係超大隻啖啖肉！

▼而甜品就點了焦糖布丁及熔岩巧克力蛋糕，焦糖布丁有手掌咁大份！

▼中午到傍晚時間，玩完水又或者做完運動想食小食，就可以去海上多功能運動熱狗屋

▼側邊仲有溫水、冰水同青檸水提供

▼又或者可以另外加購飲品

▼熱狗的麵包、腸同配料都可以自由搭配

▼半夜肚餓要食宵夜就可以去索倫托餐廳，開放時間到凌晨 2 點。

▼店內有 4 款 Pizza 可選，全部都係薄批，其中有一款仲係素食添！所以夜晚係唔會餓既，因為有免費 Pizza 食到你飽為止。

▼呢邊都有飲品吧提供咖啡、茶、果汁等

▼每房仲有包一次免費房內歐陸式早餐送餐服務，有各式果汁飲料、麵包、谷物、水果及乳酪可選，全部都係任點任食！

▼將成盤早餐拎出去露台，望住呢個海景食真係超爽！非常建議大家留一日叫房早餐！

▼房早餐提供的食物同自助餐、主餐廳提供的都一樣，只係選擇相對少一點。

收費餐廳
難得去郵輪玩，今次亦有預訂埋「美味暢享套餐」，，可於美式牛排館、奧利弗義大利餐廳、川谷薈、海涵火鍋、泉．日式餐廳(限 US$35 餐飲消費額，不含服務費)享用每日午餐及晚餐，但每餐僅限選一間餐廳，每人每晚 US$26.72 起，必須全程購買。同時，亦都預訂咗大董意境坊的九道菜套餐，每位 US$75。所有餐飲套餐 5 歲以下小童免費，而 6 – 12 歲兒童於特色餐廳用餐只需 US$10，於啟航之前預訂的話，兒童價格會在登船後再進行調整，最後 Check 返單就會見到平咗㗎啦！（查看所有餐飲套餐優惠按此）另外提提大家，收費特色餐廳都需要預約時間，上船後記得先用遊輪 App 預約定座位，根據今次的經驗，整個航程的大部份餐廳座位於第一日就會預約滿座，所以你唔好諗住上到船先諗行程，唔諗就想食既時候無得食。

▼Jamie’s Italian 奧利弗義大利餐廳主打新鮮手工意粉

▼招牌之一的 Classic Meat Plank，超適合送酒食

▼前菜 Baked Mushrooms 及 Crispy Squid

▼意粉方面就試了 3 款，分別是 Prawn Linguine、Truffle Tagliatelle 及 Seafood Linguine，以及一款配菜 Crispy Polenta Ships

▼意粉口感煙韌真好食！

▼甜品就叫了 Classic Tiramisu、Ice cream 及 Sorbet，其 Tiramisu 特別在於加入了少許橙皮，食落帶股橙香味，而且蛋糕比例較多，食起黎冇咁易腻。

▼大董 Wonderland by Dadong 是北京烤鴨名店，提供 Fusion 中菜

▼餐廳內部設計都真係好似 Wonderland 咁好夢幻

▼呢到餐牌仲要用毛筆點墨水掃開先睇到，超得意！今次一共會體驗 9 道菜

▼首先係鮮花椒熗象拔蚌，選用加拿大象拔蚌炮製而成，食落帶麻香味好開胃

▼煙熏老干媽三文魚牛油果卷，有濃郁的木香味

▼芥子醬冰菜沙律，口感好爽脆

▼跟住係得獎名菜黑松露墨魚汁文思豆腐，白色一絲絲的都係豆腐黎架！

▼鵝肝汁小牛肉，肉質超軟嫩

▼藏紅花汁龍蝦飯

▼招牌片皮鴨有多達 8 款配料提供

▼鴨肉都唔少架！

▼松露肉醬麵

▼最後甜品陳皮雪糕，記得要撈埋側邊陳皮一齊食啊！

▼泉．日本餐廳 Izumi Japanese Cruisine

▼可以坐師傅面前睇住即切魚生、即整壽司

▼套餐收費 US$34.99，每位可以點 1 個小份、2 個大份及 1 個甜品，不過大份的份量都真係幾多，建議大家可以先叫一份，唔夠食先再叫多個。

▼點了蝦仁蔬菜天婦羅、海帶裙帶菜沙拉(中華沙律)及日式豬肉鍋貼，其中鍋貼煎得好香，咬落夠晒脆。

▼IZUMI 太卷壽司份量超多，唔止卷內有天婦羅，卷外亦都有炸過，香脆之餘帶點辣味，超好食！

▼主廚推薦壽司，每件壽司都已經加入少量 wasabi，真係好正宗做法。

▼香煎半熟金槍魚壽司卷都好值得一試！吞拿魚配上牛油果入口即化，咬到中心位又有香脆的蝦天婦羅，而蒜味柚子醬又帶出一點清爽感，好好食。

▼海洋光譜號其中一個賣點就是機械人酒吧 Bionic Bar

▼客人拍房卡後，可以按喜好自選飲料、酒及調製方式，然後由機械臂幫你調酒！非酒精飲品 US$4 起，而酒精飲品 US$6 起。

郵輪有沒有 Wifi 提供？

皇家加勒比遊輪提供海上最快的網速 VOOM，大家上船前就可以先買定「Voom 上網航程套票」或「VOOM 上網 + 串流航程套裝」，前者只可以傳送短訊、瀏覽網頁及收發電郵，而後者除以上功能，仲可以進行視像對話、在社交媒體貼文，及可串流播放心愛影片、電影、音樂與節目。不過個人更推薦大家上船後按日數買 Wifi 使用，因為最後落船日一早就準備要走，基本都唔需要用到上網，買套票反而浪費咗一日錢。其 Wifi 分為基礎版及高速版，每日 US$25.99 起，有需要可以於 APP 上購買或到 5 樓的 Wifi 櫃台查詢。至於網速方面，用嚟睇 Youtube 都順暢，但 IG 要上載 Story 就比較慢，短片都要用三四分鐘先上載到。

▼海洋光譜號 5 樓的 Wifi 櫃台

郵輪可唔可以食煙？

基本上成架郵輪都係禁煙嘅，即使係有露台的房都唔可以食煙。只有小部份吸煙區可以食煙，如 5 樓甲板外劃分出來的吸煙區。

▼5 樓甲板外設有吸煙區

落船時間及流程

落船前一晚，每位乘客都會收到行李條及落船指示，如果有需要託運行李，只要填好行李條並於指定時段將行李放置房間外即可，但記得證件同船卡必須隨身攜帶。到了落船當天再按照行李條上的號碼，分時段落船，唔需要託運行李的客人可於最早的 7:30 – 8:00 落船，而最遲就會於 9:15 – 9:30。落船之前記得要先填好香港政府的網上健康申報(https://www.chp.gov.hk/hdf )，並取得二維碼，之後帶齊隨身物品，去到指定甲板樓層拍船卡落船，經棧橋直接進入航站樓一樓，出示提前完成好的健康申報二維碼，通過入境檢驗檢疫，然後乘電梯到達二樓後依次排隊通過邊檢，最後就可乘坐電梯到 G 樓行李大廳領取託運行李，並通過海關檢查後出航站樓。

▼行李大廳

解答常問問題

問：一間房最多住幾多人？
答：一般客房最多可入住 4 人 (或者兩大兩細)， 不過 4 人一房就真好迫，仲要 4 人爭一廁所，而船上最大的「頂級家庭套房」最多可容納 10 人。

問：小朋友可以去邊度驗測？
答： 6 歲以下的乘客可採用大便樣本代替拭子樣本進行測試，需要採集大便樣本的人士可以從私家醫生等渠道取得採集樣本包，並於收集當日交回選定的樣本收集點。

問：電視睇唔睇到香港電視台?
答：皇家加勒比郵睇唔到 TVB、ViuTV，星夢郵輪就睇到。

問：賭場有冇開？
答：緊係有啦，郵輪主要收入都係靠賭場，都唔知幾想你入去賭幾鋪，好似話大細最少 300 蚊都玩到一鋪。

問：行程有幾多日？係咪只有 3 日 2 夜？
答：航程有提供 2 至 4 晚可選，最短 3 日 2 夜，最長 5 日 4 夜。

問：大露台標準套房同一般露台房，除左大咗仲有咩分別？
答：除左間房大咗之外，床墊同枕頭都會高級咗，露台躺椅會有加埋軟墊同頸枕，房內加設 Lavazza 意式咖啡機及浴袍，而廁所同浴室會分開兩間，有齊企缸、浴缸及一系列的精選洗護用品，包括洗髮水、護髮素、沐浴露及身體乳，入住大露台標準套房的旅客仲可以免費去銀卡臻享餐廳享用全日餐飲服務。

問：船上搖晃感大唔大？
答：只有船頭同船尾位置的搖晃感比較強，船中間的位置都唔太感覺到有搖，怕暈船浪嘅最好都係帶定暈浪丸。

問：船上影完嘅相去邊拎返？
答：大家在上船前或者船上由工作人員幫忙拍攝的照片，都可以去 5 樓的皇家攝影到拍船卡睇返，而且仲有收費列印服務提供。

總結
4 日 3 夜第一次上郵輪就講晒，大家睇完如果有問題，歡迎在留言區發問，答到盡量答大家。同埋俾多次預訂連結俾大家，記得 Check 晒呢 3 個網站邊個最平

預訂連結
KKDAY 預訂網址：https://www.kkday.com/zh-hk/product/120063?cid=2058&ud1=Cruisecation
KLOOK 預訂網址：https://www.klook.com/zh-HK/activity/58091-2-3-4-night-hong-kong-cruise-royalcaribbean-spectrumoftheseas/?aid=16&aff_ext=Cruisecation
專業旅運預訂網址：https://www.texpert.com/tw/cruise/seacation.aspx?page=1?a_aid=RH

────── 相關文章 ──────

【名勝世界壹號香港快閃優惠】最平 3 日 2 夜 2 人套票 HK$3,599 起，任玩娛樂設施，送 CLUB SIM 台灣 2 日數據卡！

【兩大郵輪優惠】星夢郵輪今年最後優惠 3 日 2 夜每位 HK$1,188 起！皇家加勒比郵輪兩晚折後最平每位 HK$2,833 起住露台房！